Proverbs 1

Isingeniso: Injongo Yendaba

1Izaga zikaSolomoni indodana ka-Davida, inkosi yako-Israyeli:

2ukuba abantu bazuze ukuhlakanipha lokuzithiba; ukuba bazwisise amazwi okuqedisisa;

3ukuba bazuze impilo yokuzithiba lobuqotho, besenza okulungileyo, okufaneleyo lokuqondileyo;

4ukunika ulwazi kwabayizithutha, ulwazi lokukhetha okuqondileyo kwabatsha –

5ukuthi ohlakaniphileyo alalele engeze ukufunda kwakhe, kuthi obonisisayo azuze izeluleko –

6ukuba abantu bazwisise izaga lemizekeliso, izitsho lamalibho abahlakaniphileyo.

7Ukwesaba uJehova kuyikuqala kolwazi, kodwa iziwula ziyakweyisa ukuhlakanipha lokuzithiba.

Izixwayiso Ngokubambelela Elwazini Isixwayiso ngokuhugeka

8Lalela, ndodana yami, izeluleko zikayihlo njalo ungadeli imfundiso kanyoko.

9Kuzakuba ngumqhele omuhle ekhanda lakho lomgaxo wokucecisa intamo yakho.

10Ndodana yami, aluba izoni zikuhuga, ungaze wavuma.

11Uma zisithi, “Woza sihambe; kasicathamele abantu sichithe igazi, kasicwathele omunye umuntu ongelacala;

12kasibaginye bephila njengengcwaba, sibathi jwamu njengabawele emgodini;

13sizazuza impahla ezinhle ezahlukeneyo sigcwalise izindlu zethu ngempango;

14phathisana lathi ukuze sabelane lezozinto” –

15ndodana yami, ungahambi lazo, ungalugxobi olwakho ezindleleni zazo;

16ngoba ezabo izinyawo zigijima ekoneni, bayaphangisa ukuchitha igazi.

17Kakusizi ukuthiya ngembule lithe dandalazi emehlweni ezinyoni!

18Abantu laba bacathamela ukuchitheka kwelabo igazi; bajuma okwabo ukuphila.

19Sinjalo isiphetho salabo abadinga inzuzo ngokugebenga; kuyayichitha impilo yalabo abayitholayo.

Isixwayiso Ngokufulathela Inhlakanipho

20Ukuhlakanipha kuyamemeza emgwaqweni, kuphakamisa ilizwi lakho ezinkundleni;

21kuyanqongoloza lezindleleni okuxokozela khona, kuyatshumayela emasangweni omuzi kuthi:

22“Koze kube nini lina zithutha lithanda ubuthutha benu na? Koze kube nini izideleli zikholisa ukudelela leziphukuphuku zizonda ulwazi na?

23Aluba lilalele ukukhuza kwami, ngabe ngalivulela isifuba sami ngalivezela imicabango yami.

24Kodwa ngenxa yokuthi langifulathela ngilibiza, kwangabi khona onginanzayo ngiselula isandla sami,

25njengoba lala izeluleko zami kalavuma ukukhuza kwami,

26ngakho lami ngizahleka selihlupheka; ngizaliklolodela nxa lisehlelwa lusizi –

27nxa usizi lulehlela njengesiphepho; nxa incithakalo ilikhukhula njengesivunguzane, nxa usizi lezinhlupheko ziligabhela.

28“Lapho-ke bazangibiza kodwa kangiyikusabela; bazangidinga bangangifumani.

29Ngoba babeluzonda ulwazi kabaze bakhetha ukwesaba uJehova,

30ngoba kabavumanga iseluleko sami, badelela ukukhuza kwami,

31bazakudla izithelo zokuhamba kwabo basuthiswe ngezithelo zamacebo abo.

32Phela ubuhlongandlebe bezithutha buzazibulala, lokungananzi kweziphukuphuku kuzazibhubhisa;

33kodwa lowo ongilalelayo uzahlala evikelekile ekhululekile, engesabi lutho olungamlimaza.”